مرغم عليك يا صبح مغصوب يا ليل
لادخلتها برجليا ولا كان لى ميل
شايلنى شيل دخلت انا فى الحياة
وبكره ح اخرج منها شايلنى شيل
عجبى!!
وانا فى الضلام...من غير شعاع يهتكه
اقف مكانى بخوف ولا اتركه
ولما يجى النور واشوف الدروب
احتار زيادة.. ايهم اسلكه؟
عجبى!!
ياما صادفت صحاب وما صحبتش
وكاسات خمور وشراب وما شربتهمش
اندم على الفرص اللى انا سبتهم
ولاعلى الفرص اللى ما سبتهمش
عجبى!!
انا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى انا
اخرس ولكن قلبى مليان كلام
عجبى!!
عجبتنى كلمة من كلام الورق
النور شرق من بين حروفها وبرق
حبيت اشيلها ف قلبى...قالت حرام
ده انا كل قلب دخلت فيه اتحرق
عجبى!!
حبيت.. لكن حب من غير حنان
وصاحبت لكن صحبة ما لهاش امان
رحت لحكيم واكتر لقيت بلوتى
ان اللى جوه القلب مش ع اللسان
عجبى!!
ورا كل شباك الف عين مفتوحين
وانا وانتى ماشين يا غرامى الحزين
لو التصقنا نموت بضربة حجر
ولو افترقنا نموت متحسرين
عجبى!!
انا كل يوم اسمع ...فلان عذبوه
اسرح فى بغداد والجزاير واتوه
ما اعجبش م اللى يطيق بجسمه العذاب
واعجب من اللى يطيق يعذب اخوه
عجبى!!
اعرف عيون هى الجمال والحسن
واعرف عيون تاخد القلوب بالحضن
وعيون مخيفة وقاسيه وعيون كتير
وباحس فيهم كلهم بالحزن
عجبى!!
اقلع غماك يا تور وارفض تلف
اكسر تروس الساقية واشتم وتف
قال:بس خطوة كمان ..وخطوة كمان..
يا اوصل نهاية السكة يا البير يجف
عجبى!!
الدنيا اودة كبيرة للانتظار
فيها ابن ادم زيه زى الحمار
الهم واحد .. والملل مشترك
ومفيش حمار بيحاول الانتحار
عجبى!!
فارس وحيد جوه الدروع الحديد
رفرف عليه عصفور وقال له نشيد
منين منين .. ولفين لفين ياجدع
قال من بعيد ولسه رايح بعيد
عجبى!!
حاسب من الاحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت احزان من قبلها؟
عجبى!!
يأسك وصبرك بين ايديك وانت حر
تيأس ما تيأس الحياة راح تمر
انا دقت مندا ومندا عجبى لقيت
الصبر مر وبرضك اليأس مر
عجبى!!
ولدى نصحتك لما صوتى اتنبح
ما تخافش من جنى ولا من شبح
وان هب فيك عفريت قتيل اساله
ما دافعش ليه عن نفسه يوم ما اندبح
عجبى!!
يا عندليب ما تخافش من غنوتك
قول شكوتك واحكى على بلوتك
الغنوة مش ح تموتك انما
كتم الغنا هو اللى ح يموتك
عجبى!!
لا تجبر الانسان ولا تجيره
يكفيه ما فيه من عقل بيحيره
اللى النهارده بيطلبه ويشتهيه
هو اللى بكره ح يشتهى يغيره
عجبى!!
علم اللوع اضخم كتاب فى الارض
بس اللى يغلط فيه يجيبه الارض
اما الصراحة فامرها ساهل
لكن لا تجلب مال ولا تصون عرض
عجبى!!
يوم قلت اه .. سمعونى قالوا فسد
ده كان جدع قلبه حديد واتحسد
رديت عل الايمين انا و قلت .. اه
لو تعرفوا معنى زئير الاسد
عجبى!!