لو لم أكن مصريا .. بالزمة مش كان انضفلى..؟!

لا والف مليوووووون لا لا لان جميع الشعوب بتقول نفس كلامك مفيش حد مرتاح انا حاليا فى دوله عربيه ولو تعرفوا كميه الفساد الموجود فيها وجميع الدول كذالك انا حتفق معاك فى ان الفقر حل على الجميع فى مصر ولاكن فى نعم كتير احنا بنهدرها زى مثلا التخريبات الى بتنتج عن المظاهرات الى بنعملها ليه منكنشى محترمين علشان نحترم وليه نفضل سلبييا ديما تعرف ان مبلغ المخدرات سنويا فى مصر 2 مليار جنيه ليه كل ده وليه نفضل كده ولحد امتى حنسكت على الخراب والجشع الى ملى قلوب الناس ليه الناس مبقتش تحب بعضها ليه مبقاش فى خير زى زمان ليه حجات كتير مبقتش زى مكانت تعرفوا يا جماعه ان احلى حاجه فينا اننا مصريين والله انا سعيد جدا انى مصرى والله ان فى ناس بتنطرد من بلدها علشان بتقول لااو تتكلم عن الرئيس فى مميزات كتير فى بلدنا عن بلاد تانيه وكمان فيها عيوب بس بادينا نعدلهابالفعل ومش كلام انا كنت من سنتين زيك وامر من كلامك بس لما خرجت بره بلدى وشوفت البلاد التانيه واختلط بشعوب تانيه غيرت فكرتى وعرفت قد ايه احنا فى نعمه اسف على الاطاله واتمنى انك تعرف انت كمان قيمتها من غير البعد عنها

اخى وصديقى وعزيزى محب
اد ايه بفرح لما بشوف مصريين منتميين وحابين بلدهم ونفسهم يلاقوها زى ما كانو بيحلمو بيها وبيتحكى عنها

بس ياخساره بئه حتقول ايه فى شباب لا عاوز يتعلم ولا يشتغل ومقضيها قهاوى ونت ومخدرات ولا عندو طموح ولا حلم

وقال بيتحجج بالحكومه هى اللى مش ساباه فى حاله
ايه بعنى كل ماجى افتح مشروع صغير او حتة محل الاقى الاقى مصاريف تراخيصه وورقه اد رأس ماله مرتين
والله يابلاش بس احنا اللى بندلع

ايه يعنى لما منلاقيش وظيفه فى القطاع العام ودا طبعا لسبب بسيط ان بلدنا الحبيبه باعت كل المشاريع والمصانع وخصخصتها ومسكها رجال اعمال كبار بيخافو على شباب البلد اكتر من احكومه لدرجه انهم بيشغلو الشاب فى مصنع 12 ساعة ورديه بـ400جنيه فى الشهر
والله يابلاش بس احنا اللى بنتدلع

ايه يعنى لما احلامنا تتدمر وحيلنا يتهد وكرامتنا تتزل لحتة امين شرطه

على رأيك كله فدا مصر

حبيبى فروعون سدقنى انا مقتنع بكل كلامك عن الفقر والاستغلال وحجات كتير بقلنا سنين مش رضيين عنها
وانت تعرف انى كنت بقول اكتر من كده ولاكن معرفتش بجد معنى كلمته مصرى الا لما بعدت عن مصر وعرفت قد الحياه فيها اكرم لنا بكتير حقولك موقف جمعنى بواحد بنتكلم عن مصر وقلنى ان المصريين عاملين زى الام الى تدعى على ولدها وتكره الى يقول امين بمعنى اننا ممكن نغلط فى بلدنا وزعلانين من حكومتنا بس الغريب الى يغلط ممكن نكلوه بجد تعرف ان جميع الدول العربيه الى شويه البترول فيها عمللهم قيمه بيقولوا اننا لو مفيش بترول حنيجى نشتغل عندكم وانهم مفيش واحد يقدر يتكلم فى السياسه عن اى حاجه مع ان كل امير او حاكم للبلد اكل حقوقها وخيرها كله يا صاحبى الفساد فى كل البلاد تعرف اننا لو زى عدد كل دول عربيه حناكل بمعلقه دهب بلدنا كويسه بس احنا الى مستسلمين عن حقوقنا انا معاك ان الحكومه تعبتنا بس ده مش سبب اننا نكره مصر

فرعون مهما كانت السلبيات اللي في البلد عمرنا ما هنندم اننا مصريين بس هسأل سؤال هي السلبيات اللي في البلد مين السبب فيها؟؟ مش عدم وجود الحب بين الناس والظلم والجشع الملا قلوبهم وعدم تماسكنا وانا معاك في الفقر اللي اجتاح البلد ونظام دكتاتورية الحكم بس مهما لفيت عمرك ما هتلاقي حد يحترمك ولا يقدرك زي مصر واهلها والايجابيات الي في البلد كتير بس احنا كده مش بنحب نشوف غير السلبيات!0
وفي الاخر احنا كلنا مصريين وبنفتخر بكده وانت اكيد فخور انك مصري بس انت بتقول كده لأنك متأثر بوضع البلد اللي بيدهور كل يوم اكتر من الاول!!
عذرا لاطالتي وتقبل مروري

بصراحه اول لما الموضوع اتكتب والكل وقف يتفرج وانا برد وملقتش حد رد غيرى زعلت وقولت شكلكم كلمكم موافقين على الكلام وعلى الموضوع بس بجد ان سعيد دلوقتى ان شفت ردودكم ولكن بلاش نلوم على الفرعون هو فعلا زى ما اميره قالت زعلان على وضع البلد ومخنوق علشان ناسها والى بيحصل فيهم وطبعا يا جماعه اكيد هو مصرى ووطنى ويمكن اكتر مننا ولو مكنتش كده مكنش قلنا موضوعه
اسف انى طولت ولكن من فرحتى بيكم

ايه ياعم الوطنى فوق المحدود انت حسستنى انى ارتديت وحتقيم عليا الحد

ناقص تقول انى عميل لدوله تانيه وبعدين انت ياللى بتهتف بالوطنيه والتراث والنيل كام مره رحت وشاركت حتى فى انتخابات مجلس شعب بلاش انتخابات رياسه

ياجماعه انا مصرى حابب بلدى ونفسى اشوفها زى زمان
ام الدنيا بخيرها ونيلها وبسمتها متجنيش احزان
زى مكان اهلى حكو عنها انها كعبة كل الاوطان
ليه دلوقتى شايفها غريبة ومهزومة فى وادى الغربان
قريب وغريب بينهش فيها واتارى حاميها حراميها
وازاى فيهاانا اعيش فرحان
بالزمة مين فيكو فرحان